60歲的郭晉安（安仔）早前拍攝無綫劇集《金式森林》時，與年僅23歲的港姐冠軍莊子璇（Hilary）因戲結緣。之後更有傳出安仔私下教授Hilary打網球，師徒情深。到了四月，安仔更被揭悉心為Hilary準備生日派對，驚喜連連。近日，更有眼尖網民發現安仔狀態大勇、氣色煥然一新，疑因鍾情健身，網上一度盛傳兩人關係超越師徒，甚至出現「父女戀」的揣測。
今日（21日），莊子璇於北角為無綫節目《食好啲》外景拍攝現身，受訪時親自澄清相關傳聞：「其實打網球當日劇組多人喺場，包括何廣沛。因為我哋打得唔多，安爸爸好有耐性教我哋，真係多謝佢。（傳聞話佢為你健身變靚咗？）其實安仔本身就後生樣，只係早前拍劇要化老妝，依家返真本色，大家就覺得佢精神咗啲。我哋藝人都要keep住靚，所以做運動係基本啦。」
至於是否有可能發展感情，她笑言斷然否認：「唔會啦，我哋就好似一家人咁，關係真係好親密，但係親情嚟嘅。希望佢唔會介意外界亂咁講，因為我哋心裡明白就得。（會否抗拒與年紀較長男士發展感情？）其實我唔會用年齡去限制感情，愛係無分年紀、國界、性別。但講到安仔，我覺得我哋只會愈來愈似家人，發展成男女朋友？真係唔會。」